السبت، 17 مايو 2008

صلاة عشيق

يا بنت بنت النبي هاتي قلم وابريه
أكتب كلام للنبي وانتي اللي تمضي عليه
عزيز قوي مطلبي
مافيش دموع تشريه
عاشق وقلبه عطل
ولا حد جه يكريه
وبسمتين يديه
وطبطبة تهديه
خدي الجواب وديه
وانتي اللي تمضي عليه
صليت عشان النار ماهياش دور
لقيتني خايف من بنات الحور
صليت عشان الجنة فيها قصور
لقيتني في الشهوات أبات مأسور
حبيت لقيت الحب كفاني
شفت النعيم والضيق كمان فاني
وبقيت أنا ونفسي موالفاني
عاشق وحر॥عزيز ومتفاني

صليت على سيدي النبي وآله
من غير عدد بالغنا .. والفرض .. والسنة
قد الحطب مايحب مين شاله
من نار جهنم يغرسه فـ جنة
صليت على سيدي النبي وآله
وصل الحبيب حقه ..ماهوش منة
صلاة عشيق مستني عقباله
و فـ الانتظار ناقش ايديه حنة

سيدي علي طالع من الكوفة
من نور عينيه الشمس مكسوفة
سيفه فـ ايديه والوجهة معروفة
الرب حق يبقى الشيطان باطل
ماجاع فقير إلا بما واصل ..
جيب الغني والقسمة مش حاصل
............وقوله كان فاصل
ليه.؟ دا النصيب كتبه إله عادل

هناك 12 تعليقًا:

حواء يقول...

كلامك حلو يا امجد وشغلك فى النحت احلى .. احيك

Unknown يقول...

أنا شايف العكس يا أمجد بجد قصيدة روعة بس فيه حاجات مش عارف أقراها هتجيب كل قصايدك إن شاء الله فى لقاء المدونين عشان نقراها ونسمعك إن شاء الله
http://www.facebook.com/group.php?gid=18252776335

2ensan wnsan يقول...

صليت عشان النار ماهياش دور
لقيتني خايف من بنات الحور
صليت عشان الجنة فيها قصور
لقيتني في الشهوات أبات مأسور

الجزء دا عجبني جدا ما شاء الله عليك يا امجد كلالمك جميل جدا وشغلك في النحت جميل جدا جدا جدا

اتفق مع الرد اللي قبلي

Amgad يقول...

هايل يا امجود وافتخر اني اشترك معاك ف نفس الاسم ونفس المدينة

إبـراهيم ... يقول...

كانت أحلى بصوتك ، سعدت جدًا بيها، وبشعرك كللله، وبالتعرف عليك .... وأديني وصلت لك أهه
.
.
في انتظـارك داائمًا .....
بس ياريت تشيل موضوع الحروف اللي لازم نكتبها عشان نعلق دي :)

رحــــيـل يقول...

جميله جدا جدا بجد كلماتك
اسلوبك مميز جدا فى حاجه كده حلوة

اه كويس انك قولت يعنى ايه اسم المدونة
عامه اان بحب اصلا فصل الخريف جدا
ههه وبعدين مدونتك وانت حر فيها سميها زى مانت حاسس

تحياتى وتقديرى

رحــــيـل يقول...

جميله جدا جدا بجد كلماتك
اسلوبك مميز جدا فى حاجه كده حلوة

اه كويس انك قولت يعنى ايه اسم المدونة
عامه اان بحب اصلا فصل الخريف جدا
ههه وبعدين مدونتك وانت حر فيها سميها زى مانت حاسس

تحياتى وتقديرى

HARD TIMES يقول...

الشاعر الجميل الاستاذ امجد
سعدت جداً بتعرفي ولقائي بحضرتك
وسعدت اكتر لسماعي لكلماتك الجميلة في لقاء مدوني الدقهليه
اتمني ان نلقتي مرة اخري
ياريت بقي نشوف القصيه بتاعت الجواز العرفي دي هههههههه بجد جامده جداً
تحياتي لحضرتك

Unknown يقول...

رغم اني سمعتها منك
الا اني قرأتها كان ليها متعه تانيه

محمد فكري يقول...

جميل جداً يا امجد..
كلمات حلوة..ومش مجرد كلمات وبس..
ما وراء الكلام بيقول كتيير في النص ده.. :)
شكراً ليك
سلام

Romantic يقول...

جميلة قوي
شكرا ليك

غير معرف يقول...

استاذ امجد انت فعلا شاعر ممتمز باسلوب راقى مستوى وانا سعيد جدا بمعرفتك خصوصا احنا جيران



تحياتى بدوام التوفيق


محمد فكرى