بابه شهر قبطي بييجي في الخريف... وانا اسمي أمجد ورغم اني مش عجوز... إلا إني حاسس الخريف .
مش تشاؤم بس حاسه أعمل ايه يعني؟.. ممكن أكون غلطان... ياريت أكون غلطان... لا بجد أنا نفسي أطلع غلطان...! بس أقولك حاجة أنا حاسس لغاية الوقتي إني مش غلطان.
آه أنا مقاوح بس ياريتك تقنعني لإني مش عندي قوي كده... وبحب الربيع أصلا.. ده يعني عشان تبقى واخد بالك.
هو انت مالك بالــوش ده صحيح؟! باقولك ايه.. هي المدونة اسمها كده..( بــــابـــه) ماشي؟
واللي عاجبه يبقى مننا وعلينا... واللي مش عاجبه ياريته يقنعني ومن هنا لساعتها أنا بحب الخريف .... واحب أحسه... لإني مقدر جدا أي زهرة تبان فيه... وأي قمرة تطلع في ليله.... كلام كبير قوي .... بس سليم ورحمة ستي نبوية
ياليل بابة
لا منك حر
ولا منك كده بردان
صحيت أشرب...............
لقيتها والجمال لله عجين خمران
ومتشاهدين عليه الجان
غواية تعرف الإيمان
وخروب العيــــون يبرق.. ولا بيروي ..... ولا متعان
ياليل بابة .......لامنك حر
ولا منك
كده ........ بردان
ياليل بابه ..في قلبي مكان
لغيط ..ولنهر يجري .... وخان
وعيل قافل الدكان
قعد على حرف بير ...يسكر
قعد يستطعم الدخان
وينفخ في السحاب يكبر
وليه في الحلم ليه هربان ؟
ياليل بابه
لامنك حر
ولا منك
كده ........ بردان
ياليل بابة
وفيك الجان
بتتشعبط في ديل فستان
وتتحايل على الإمكان
ويسكن في الصدور عصفور
يغني في الضلوع مندور
دبيح بيفرح الغابة
ياليل بابة
لا منك
......
حر
ولا منك
......
بردان
